悠閒生活…？

最近除咗HON PRO既事，基本上都好悠閒，甚至可以講我係悠閒到咩都唔記得。

PSY考試冇溫書，我諗呢個係我人生既大突破，以前既我應該只會溫完都心緒不寧。但今次唔知點解覺得…算啦　考試姐　反正咁辛苦都唔會Ａ架啦

結果雖然合格　但係低過mean　我反而覺得好驚喜　心諗自己應該有廿分都偷笑

跟住試過唔記得Reg科﹑唔記得交功課﹑唔記得還書…

我好似愈來愈hea，即係以前自己最憎既野。

唔知係咪因為就畢業…諗起幼稚園好似打仗咁既生活，冇哂自己，我而家就好似要盡情悠閒咁。有錢，就去下旅行，食下鍾意既野，唔再為$11既一個包諗好耐都決定唔買。

但我總係覺得呢種生活令我覺得好似若有所失咁，係咪我生嚟就辛苦命，真係好犯賤…

不過我好享受可以多咗時間係屋企，可以多咗時間做鍾意既野，可以想打機就打機。

不過對補習既野愈來愈上心，好想一直補班馬嬲仔…好想用唔同方法令佢地開心咁學習。可惜，禮拜六補兩個鍾都搞唔掂啲野，而家啲到底係咪真係比小學生讀…

又可能因為最近得閒啲，無啦啦諗起英國既野…

明明係英國嗰時唔算好開心，亦唔算好深刻，甚至可以講，每次諗起我都有一種孤獨同若有所失既感覺。我諗起去過既地方﹑諗起每日返工既地方﹑諗起倫敦既氣溫﹑諗起住過既屋﹑諗起夜晚坐係窗邊吹風既感覺﹑諗起同partner一齊開心唔開心既時刻…莫明地諗起呢一切…但你問我想唔想再返去再經歷一次，我唔想，因為呢種係令我不安既感覺…人真係好奇怪，真係未必係最美好既野先會回想起。

不過點都好，諗起既時候我都冇後悔，而呢種奇怪既感覺亦都慢慢淡忘…

最近仲學埋打泰拳，因為想減肥。開頭打真係又想放棄，但慢慢覺得當中需要既恆心同毅力真係非一般，真心對打泰拳既人改觀。所以，希望繼續加油學多８堂！！希望我既堅持可以繼續增強，而我既脂肪就繼續減少！！

YEAH